هو ليه ميكونش دخول الاستاد بالرقم القومى

انا نفسى الدخول الى الاستاد بعد كده يكون بالرقم القومى بمعنى ان يكون قطع التذاكر الكترونى من خلال النادى صاحب الارض او الاستاد المقام عليه المباراة بس نتمنى من وزارة الداخلية ( لما تنظف طبعا من الوساخه اللى هى فيها ) انها تزود مصممى برنامج قطع التذاكر ببيان محدث تلقائيا بارقام بطاقات الناس اللى عليهم سوابق او عليهم احكام الخ الخ الخ بحيث ان البرنامج اللى فى الكومبيوتر نفسه مش يطبع للناس دى تذكر ويظهر كده بالخط العريض ( هذا الشخص ممنوع من دخول المنشات الرياضية ) مع وجود بوابات الكترونية على الاستادات زى بتاعة المترو والبوابة يكون عليها جهاز كشف الاسلحة سواء نارية او اسلحة بيضاء

اقسم بالله تكلفة الموضوع ده متساويش ظفر واحد من الشباب اللى مات علشان بس مفيش حد يقولى التكلفة ومش التكلفة والتكاليف دى اصلا المفروض تتاخد من الاندية ومن اللاعيبة لان ده يعتبر تامين لمصدر رزقهم وكل الاجهزة دى موجوده فى مصر وفى اماكن كتير اوى وهاتسهل كتير اوى من عمليات التفتيش فى الدخول وبردوا هاتمنع السوق السودا فى بيع التذاكر والاهم انها هاتمنع دخول اصحاب السوابق الى الاماكن والمنشات الرياضية لان ده مكان للناس المحترمة مش للبلطجية والاوساخ

انا شايف ان الموضوع سهل وبسيط واى حد دارس شبكات وبرمجه يقدر يعمل البرنامج ده بسهولة جدااا وزى ما قولت بالتعاون مع الداخلية ( لما تنظف من وساختها ) يكون فى تحكم اكبر فى دخول من يريد كرة القدم وفقط

فى اوروبا فى بعض المتعصبين محرومين من دخول الاستاد مدى الحياة وفى ناس محرومة من قيادة سيارتها مدى الحياة بردوا طب بيعرفوهم ازاى ؟؟؟ - وبنرجع نسال ازاى الناس دى بتقعد تتفرج على الماتش وبيكون بينها وبين الملعب متر واحد ومفيش حد بيقدر ينزل ارض الملعب وحالات الشغب نادرة جدااا فى الدول المحترمة رغم انهم بيكونوا سكرانين ومجانين والكورة اصلا هناك تجنن العاقل

ومن الاخر اللى مش بيتعلم من الدم يبقى معندوش دم